A decisión de creala nosa empresa de xeito colectivo obríganos a analizalas distintas posibilidades societarias existentes: sociedades civís, mercatís e de economia social. Entre as últimas atopámonos coa cooperativa de traballo asociado.

As opinións das nosas protagonistas orientanse cara a responsabilidade compartida e a participación conxunta no proxecto, así que, sen dúbida, a súa empresa é unha cooperativa de traballo asociado.

Cooperar = actuar conxuntamente para acadar un fin.
Asociar traballo = unirse para traballar en equipo

A cooperativa de traballo asociado é, polo tanto, a unión de varias persoas para por en marcha  unha actividade, mediante o seu traballo persoal, que formalizan creando unha empresa que organizan e xestionan de acordo cos seus intereses.

Non é suficiente con implicarnos na cooperativa, é necesario que nos comprometamos. Ademáis o noso compromiso será dobre: co traballo e coa boa marcha da empresa, porque adquirimo-la condición de socias/os traballadoras/es.

Como as veces non é fácil ter clara a diferencia entre implicarse e comprometerse, velaí un exemplo simpático, que o aclara moi ben: "nunha tortilla de xamón, a galiña implícase pero o porco comprométese".

TRABALLO > COOPERACIÓN > COMPROMISO